Nga Frank Gardner
Korrespondenti i sigurisë, BBC
Lindja e Mesme është edhe një herë në prag të një konflikti shumë më të gjerë dhe më të dëmshëm sesa zjarre që tashmë flakërojnë në Liban, Gaza dhe gjetkë.
Tani gjithcka varet nga mënyra se si Izraeli synon të ndjekë premtimin e tij të mirëpublikuar për ta “bërë Iranin të paguajë një çmim të rëndë” për breshërinë e fundit të raketave balistike.
Nëse Izraeli i kundërpërgjigjet fuqishëm Iranit – dhe shumë po e kërkojnë që të mos e bëjë këtë – atëherë Republika Islamike është zotuar se do të hakmerret nga ana tjetër, jo vetëm kundër Izraelit, por edhe kundër atyre vendeve që i sheh se e mbështesin atë.
Kjo mund të vërë në rrezik sulmi bazat ushtarake amerikane dhe britanike, në Gjirin Persik apo edhe në Qipro, në të cilat mund të arrijnë raketat me rreze të gjatë veprimi të Iranit Ghadr-1.
Me zbehjen e shpresave për ndonjë armëpushim të afërt qoftë në Gaza, qoftë në Liban, Izraeli duket i vendosur të përballet me të gjithë armiqtë menjëherë, me mbështetjen e kualifikuar nga SHBA dhe Britania. Ushtarakisht, ajo është më e fortë se çdo kundërshtar i saj, por luftërat e filluara, rrallë përfundojnë shpejt.
Gati një vit pas sulmeve të Hamasit të 7 tetorit, forcat izraelite janë ende në Gaza. Pushtimi i Libanit nga Izraeli zgjati 18 vjet.
Dhe një konflikt i zgjatur dhe i drejtpërdrejtë me Iranin mund të ketë një seri pasojash të panjohura për rajonin dhe për botën më gjerë./BBC
