Ndërsa “Kinostudio” kryeministrore vazhdon të prodhojë filma me seri për mrekullinë turistike që po ndodh në jug, një ekip gazetarësh nga Mespec.al udhëtoi në Ksamil.
Enkas zgjodhëm të mos hyjmë diku “alla shqiptarçe”, pra me të pyetur, por ndaluam rastësisht, siç do të bënte një i huaj që vjen për herë të parë në vendin tonë.
Ndaluam në një nga plazhet e shumta në bregdetin për të cilën qeveria tregon të vertetën kur thotë se është plot, në Ksamil. I mbingarkuar kur sapo ka nisur 15-ditëshi i dytë i korrikut.
Shezlong bosh mezi gjeje, me një çmim 20 euro.
Parkimi publik 1 euro ora, pra nëse rri gjithë ditën, llogarite vetë.
Por kurthi më i madh është tek ushqimi. Të paguash 17 euro për dy këmbë oktapodi është vërtet e tepruar.
Ajo me të cilën Shqipëria tërhoqi turistë dhe u bë “trend” ndërkombëtar janë pikërisht çmimet e lira. Dhe në Ksamil, “kartolina” e turizmit shqiptar në Google, çmimet vetëm të tilla nuk janë siç e shikoni edhe në faturën më poshtë.
Vetëm tentakulat e një oktapodi që janë 8, ky restorant i ka shitur me 6800 lekë dhe fitimi është i majmë. Por makutëria ka një çmim. Dardha e ka bishtin prapa.
Dhe nëse qeveria nuk i le pak pas dore filmat me turistë të lumtur që pushojnë në plazhet dhe të merret seriozisht me problemet që ka turizmi, së shpejti krahas fotove të Maldiveve të Europës kur kërkohet Ksamil, në google do të ketë më shumë përshtypje negative.
Dhe jo nuk na e kanë fajin ata që na e duan të keqen siç po kërkohet të shitet këto ditët e fundit.
Fajin e kemi vetë! Ajo çfarë bëjmë ne me turizmin mjafton për t’ u vetëshkatërruar.
Kryeministër ndaloje bumerangun sa jemi në kohë!
