Elhaida Dani, përfaqësuesja e Shqipërisë në Eurovision 2015 dhe një nga këngëtaret më në zë të vendit, do të jetë drejtoresha artistike e Festivalit të 63-të të Këngës. Vetë Elhaida Dani fitoi festivalin në edicionin e vitit 2014, që i dha një pasaportë për të udhëtuar në Vjenë. Dhjetë vite më vonë, këngëtarja kalon në anën tjetër të skenës dhe do të jetë një nga regjisorët.
Radio Televizioni Shqiptar synon që kontrata të zgjasë më shumë se një vit. Vetë drejtori i përgjithshëm i RTSH-së, Alfred Peza, e ka bërë me dije emërimin e saj me këto fjalë: “Ardhja e Elhaidës është një lajm i mirë për mua, për stafin dhe për të gjithë opinionin publik, sepse do të jetë një vlerë e shtuar për festivalin, nisur nga karriera e saj e shquar nga fitoret e saj në konkurse të shumta muzikore. Me të do të punojë edhe Bojken Lako, drejtori i Festivalit të 62-të, i cili bëri një nga festivalet më të mira që ka bërë RTSH.”
Elhaida Dani, shumë e emocionuar për përgjegjësinë e saj të re, siguron se gjithë eksperiencën e saj personale dhe profesionale do ta përcjellë në Festivalin e Këngës, për të cilin tashmë ka nisur puna. “ Është kënaqësi dhe përgjegjësi e madhe. Jam lindur dhe rritur në Festivalin e RTSH dhe falë tij jam ngjitur edhe në skenën e Eurovizionit. E di se çfarë do të thotë ky festival për artistët shqiptarë. Unë e di rëndësinë. Do të bëj maksimumin në këtë edicion, por edhe në ato të ardhshmet. Është një mundësi e artë për t’i treguar Shqipërisë vlerat më të mira. Synimi ynë është të zgjedhim një ekip sa më profesional, sa më serioz, për të bërë një punë të shkëlqyer në këtë festival dhe në ato të ardhshmet”
Elhaida Dani është 31 vjeçe, por e nisi karrierën që në moshën 16-vjeçare, duke fituar talent shoë- n Star Akademi dhe në vitin 2012 fitoi Top Fest . Në vitin 2013 mori pjesë në The Voice of Italy. Në Festivalin e Këngës mori pjesë për herë të parë në vitin 2011, duke fituar çmimin për melodinë më të mirë. Asaj iu desh të priste deri në vitin 2014 për të fituar, ndërsa përfaqësoi Shqipërinë në Eurovizion me “I’m Alive” . Një tjetër vepër e dukshme në karrierën e artistes është roli i Esmeraldës në muzikalin ndërkombëtar “Notre Dame de Paris”. RTSH
