Një hap përpara në rrugën e ligjit për surrogacinë. Komisioni i Drejtësisë së Senatit i ka dhënë dritën jeshile projektligjit të FDL-ve që prezanton “krimin universal”, një vepër penale që dënohet kudo dhe për këdo qoftë i huaj apo italian.
Pas përfundimit të shqyrtimit të amendamenteve dhe shpjegimeve të votës, grupet i dhanë mandatin relatorit për t’u paraqitur në sallë, qendra e djathtë ishte pro, opozitat kundër. Masa, e cila mban firmën e Fratelli d’Italia dhe e mbështetur fuqishëm nga vetë kryeministrja Giorgia Meloni, u miratua në Dhomë më 26 korrik 2023.
Mëmësia surrogate, sipas Augusta Montaruli, nga Fratelli d’Italia, është “një praktikë e padenjë, e cila transformon trupin e grave dhe lindjen e fëmijëve në mallra për t’u shitur tek ofertuesi më i lartë. E gjithë kjo është jashtëzakonisht e neveritshme dhe nuk ka të bëjë me lirinë për të qenë prind ose për të bërë me trupin tuaj atë që dëshironi. Ky biznes që po bëhet gjithnjë e më shumë modë në botë, i ndaluar në Itali, duhet të dënohet absolutisht”, deklaroi Augusta Montaruli, zv/shefe e grupit parlamentar të Fratelli d’Italia në Dhomën e Deputetëve të parlamentit italian.
“Italia konfirmon veten si një komb në ballë në frontin e të drejtave, kundër formave të reja të shfrytëzimit të grave dhe fëmijëve. Ne mbrojmë të drejtën e fëmijëve për origjinën e tyre, të drejtën e grave për të mos u shfrytëzuar.”, deklaroi ministrja për Familjen, Lindjen dhe Shanset e Barabarta Eugenia Roccella, duke komentuar miratimin e projektligjit për surrogacinë në komisionin e Senatit.
