Julian Assange është kthyer në shtëpi në vendlindjen e tij Australi, pasi një marrëveshje për pranimin e fajësisë e lejoi atë të lirohej nga një burg në Londër.
Pati skena emocionuese në aeroportin e Canberra-s, teksa themeluesi i Wikileaks puthi gruan e tij dhe përqafoi babanë e tij.
“Julian ka nevojë për kohë, për t’u mësuar me lirinë,” tha Stella Assange në një konferencë shtypi menjëherë pasi bashkëshorti i saj zbriti nga avioni.
Për 14 vitet e fundit, Assange ka qenë në një betejë ligjore me zyrtarët amerikanë, të cilët e akuzuan atë për zbulimin e dokumenteve të klasifikuara, të cilat ata thonë se rrezikojnë jetë.
52-vjeçari nuk mori pjesë në konferencën për shtyp në Canberra, por la avokatin dhe gruan e tij të flisnin në emër të tij.
“Duhet të kuptoni se çfarë ka kaluar ai”, tha zonja Assange.
Çifti u martua në burgun Belmarsh të Londrës në vitin 2022 dhe kanë dy fëmijë së bashku.
Marrëveshja e pranimit të fajësisë bëri që Julian Assange të pranohej fajtor për një akuzë të komplotit për të marrë dhe zbuluar informacionin e mbrojtjes kombëtare, në vend të 18 akuzave me të cilat ai fillimisht po përballej.
Rasti u përqendrua rreth një zbulimi masiv të Wikileaks në vitin 2010 kur uebfaqja publikoi një video nga një helikopter ushtarak amerikan, i cili tregonte se civilët po vriteshin në kryeqytetin irakian Bagdad.
Ai gjithashtu publikoi mijëra dokumente konfidenciale që sugjeronin se ushtria amerikane kishte vrarë qindra civilë në incidente të pa raportuara gjatë luftës në Afganistan.
Zbulimet u bënë një histori e madhe, duke nxitur reagime nga të gjitha anët e globit dhe çuan në një shqyrtim intensiv të përfshirjes amerikane në konfliktet e huaja.
Avokatja e tij, Jen Robinson, u tha mediave se marrëveshja ishte “kriminalizimi i gazetarisë” dhe se ishte një “precedent i rrezikshëm”.
Avokati i tij dha gjithashtu detaje mbi një telefonatë midis Assange dhe kryeministrit australian Anthony Albanese, i cili ka qenë i rëndësishëm në sigurimin e lirimit të tij. Assange i tha kryeministrit se ai “i shpëtoi jetën”, tha zonja Robinson, duke shtuar: “Unë nuk mendoj se është një ekzagjerim”.
“Kjo është një fitore e madhe që Australia u ngrit kundër një aleati dhe kërkoi kthimin e një shtetasi australian,” tha ajo.
Albanese mbajti konferencën e tij për shtyp të mërkurën, duke thënë se është “shumë i kënaqur” që çështja ka përfunduar, duke shtuar se themeluesi i Wikileaks ka kaluar një “sprovë të konsiderueshme”.
Kryeministri ka thënë në të kaluarën se nuk pajtohet me gjithçka ka bërë Assange, por “mjaft eshte mjaft” dhe ishte koha që ai të lirohej, duke e bërë çështjen prioritet.
Kur u pyet nëse marrëveshja për pranimin e fajësisë mund të ndikojë në marrëdhëniet SHBA-Australi, ai tha: “Ne kemi një marrëdhënie shumë pozitive me Shtetet e Bashkuara. Unë e konsideroj Presidentin Biden si një mik, i konsideroj marrëdhëniet e tyre si absolutisht qendrore.”
Shtëpia e Bardhë nuk kishte asnjë lidhje me ekstradimin e Assange, tha zëdhënësi i Këshillit të Sigurisë Kombëtare, John Kirby.
Assange i kaloi pesë vitet e fundit pas hekurave në burgun Belmarsh të sigurisë së lartë të Londrës, duke luftuar përpjekjet e SHBA për ta ekstraduar atë për t’u përballur me akuzat për rrjedhjet e dokumenteve.
Në vitin 2010, ai u përball me akuza të veçanta për përdhunim dhe sulm seksual në Suedi, të cilat ai i mohoi. Ai kaloi shtatë vjet i fshehur në ambasadën e Ekuadorit në Londër, duke pretenduar se rasti suedez do ta çonte atë që të dërgohej në SHBA.
Autoritetet suedeze e hoqën këtë çështje në vitin 2019 dhe thanë se kishte kaluar shumë kohë nga ankesa origjinale.
Grupet për të drejtat e grave në Suedi thonë se është turp që ai kurrë nuk u përball me pyetje zyrtare lidhur me akuzat për përdhunim.
“Është një kapitull turpi dhe tradhtie që përfundon me lirimin e tij”, tha për agjencinë e lajmeve Reuters Clara Berglund, kreu i Lobit të Grave Suedeze.
“Kjo ka të bëjë me një rast që ndodh në skenat kryesore politike dhe dhunës së burrave ndaj grave i jepet një peshë tepër e vogël.”/BBC
